Uqandada “ASAN xidmət” konsepsiyası əsasında ilk mərkəz açılıb. Bu barədə İnsanoid Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinə istinadən bu gün, 31 iyul tarixində xəbər verir.
Uqanda Respublikasının Hoima şəhərində “ASAN xidmət” modeli əsasında fəaliyyət göstərəcək Dövlət Xidmətləri Mərkəzinin açılışı baş tutub.
Mərasimdə Dövlət Agentliyinin sədri Ülvi Mehdiyevin rəhbərlik etdiyi nümayəndə heyəti, Uqandanın dövlət xidmətləri naziri Vilson Muruli Mukasa və digər qonaqlar iştirak ediblər.
Azərbaycan və Uqanda bayraqlarının ucaldıldığı tədbirdə hər iki ölkənin dövlət himnləri səsləndirilib.
Uqandanın ilk regional xidmət mərkəzi olan Dövlət Xidmətləri Mərkəzində 14 dövlət qurumunun 30-dan çox xidməti həyata keçiriləcək.
Tədbir çərçivəsində uqandalı nazirə “ASAN xidmət” ilə səmərəli əməkdaşlığa görə” Azərbaycan Respublikasının medalı da təqdim edilib.
Sonda Uqandanın milli musiqiləri və rəqsləri nümayiş etdirilib.
Hazırda Dövlət Agentliyi tərəfindən "ASAN xidmət" təcrübəsinin paylaşılması istiqamətində 20-dən çox ölkə ilə əməkdaşlıq davam edir.
[caption id="attachment_123860" align="alignnone" width="696"]
Foto Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin Facebook səhifəsi[/caption]
