Bu gün Avropa Təhlükəsizlik və Əməkdaşlıq Təşkilatı Parlament Assambleyasının (PA) nümayəndələrinin Zəngilan rayonuna səfəri başlayıb. Bu barədə 23 may tarixində Report məlumat verib.
Onlar Zəngilan şəhərində həyata keçirilən yenidənqurma işləri, eləcə də "Ağıllı kənd” konsepsiyası əsasında yenidən salınmış Ağalı kəndi ilə tanış olacaqlar.
Daha sonra Prezidentin Zəngilan rayonu üzrə xüsusi nümayəndəsi Vahid Hacıyev qonaqlar üçün təqdimat keçirəcək. ATƏT rəsmiləri dəmir yolu infrastrukturuna, “Azərişıq” ASC-nin “Yaşıl Enerji” obyektlərinə baş çəkəcəklər.
Xatırladaq ki, mayın 22-də Bakıda ATƏT PA-nın nümayəndələrinin iştirakı ilə “Yaşıl iqtisadiyyat, nəqliyyat əlaqələndirilməsi və dayanıqlı inkişaf vasitəsilə təhlükəsizlik və sabitliyin təşviqində milli parlamentlərin rolu” mövzusunda konfrans keçirilib.
