Azərbaycanda Milli Kino Günü 2 avqustda qeyd olunur. Bu tarix 18 dekabr 2000-ci ildə ümummilli lider Heydər Əliyev tərəfindən imzalanmış Sərəncamla təyin edilib.
Azərbaycanda ilk sənədli film 2 avqust 1898-ci ildə Aleksandr Mişon tərəfindən nümayiş olunub. Həmin il “Bibiheybətdə neft fontanı yanğını”, “Balaxanıda neft fontanı”, “Şəhər bağında xalq gəzintisi”, “Qatarın dəmiryol stansiyasına daxil olması” və başqa filmlər çəkilib.
22 dekabr 1993-cü ildə Azərbaycan Nazirlər Kabinetinin Sərəncamına əsasən, Azərbaycan Respublikası Dövlət Film Fondu (ARDFF) yaradılıb. Fond 1994-cü ildən fəaliyyət göstərir. ARDFF-də Azərbaycan və dünya kino əsərlərinin orijinalları və nüsxələri saxlanılır. Onların arasında “Qız qalası” (1924), “Bismillah” (1925), “Sevil” (1929), “Lətif” (1930), “İsmət” (1934), “Almaz” (1936), “Bakılılar” (1938), “Səbuhi” (1941), “Fətəli xan” (1947), “Bakının işıqları” (1950), “Bəxtiyar” (1955), “O olmasın, bu olsun” (1956) və digərləri var. Fondda filmlərdən başqa, kino sənətkarları ilə bağlı sənədlər, onların əlyazmaları, montaj vərəqələri, rejissor ssenariləri, diplom və prizlər saxlanılır.
