Mingəçevir polisi vətəndaşların etibarından sui-istifadə edərək onları aldadan şəxsi saxlayıb. Bu barədə İnsanoid Daxili İşlər Nazirliyinin Mətbuat Xidmətinə istinadən bu gün, 30 noyabr tarixində xəbər verir.
Avtomobil almaq istəyən şəxslər onlayn yolla göndərdikləri behi geri ala bilmədiklərini və ümumiyyətlə, həmin nömrə ilə əlaqə saxlamağın mümkün olmadığını görüb polisə müraciət ediblər.
Vətəndaşlara qarşı dələduzluq edən Samux rayon sakini Azər Əliyev saxlanılıb.
A.Əliyev avtomobil elanları saytında digər satıcılara məxsus avtomobillərin fotoşəkillərini və məlumatlarını özünə məxsus nəqliyyat vasitəsi kimi təqdim edib. Saxlanılan şəxs avtomobilləri almaq istəyən alıcılardan öncə müxtəlif məbləğlərdə beh tələb edib, daha sonra isə guya etibarnamə vermək üçün onlardan şəxsiyyət vəsiqələrinin fotoşəkillərini istəyib. İz itirmək məqsədilə həmin şəxsiyyət vəsiqələrindən istifadə edərək zərərçəkmişlərin adına onlayn ödəmə sistemlərində hesablar yaradıb və növbəti dəfə avtomobil almaq istəyən şəxslər də ilkin ödənişi məhz həmin hesablara göndəriblər.
Alıcılardan beh aldıqdan sonra isə A.Əliyev telefon zənglərinə cavab verməyərək onlarla əlaqəni kəsib və həmin şəxslərin pullarını dələduzluq yolu ilə mənimsəyib.
