Bəstəkar, pianoçu, caz-muğam üslubunun banisi, Azərbaycanın əməkdar artisti Vaqif Mustafazadə 16 mart 1940-cı ildə Bakıda İçəri Şəhərdə anadan olub. O, 1963-cü ildə Asəf Zeynallı adına Bakı Musiqi Kollecini bitirərək Bakı Musiqi Akademiyasına daxil olub. İlk məşhurluq da elə bu zaman gəlib. Mustafazadə burada kiçik konsertlər verib, klublarda çıxış edib, əsasən, klassik caz, bluz və oynaq mahnılar ifa edib.
Pianoçu 1964-cü ildən “Orero” ansamblına, “Qafqaz” caz üçlüyünə, “Leyli” və “Sevil” qadın vokal instrumental və “Muğam” instrumental ansambllarına rəhbərlik edib. Beynəlxalq caz müsabiqələri və festivallarının laureatı olub. Bəstəkar 1979-cu ildə Monakoda yeni caz festivalında iştirak edib. Bu tədbirin şərtlərinə görə, əsərin müəllifi, ifaçısı və ölkəsi gizli saxlanılmalı idi. Festival başa çatdıqdan sonra yüzlərlə naməlum ad içərisindən: “Azərbaycan, Vaqif Mustafazadə”,- eşidilib. O, Azərbaycana “Ağ royal” mükafatı ilə qayıdıb.
“Muğam” simfoniyasının (tamamlanmamış) müəllifi olan Vaqif Mustafazadə Azərbaycan caz musiqisinin banisi və yeni Caz-Muğam devizinin təsisçisidir. O, muğamın klassik amerikan caz musiqisi ilə sintezini yaradıb. Tanınmış bəstəkar Azərbaycan Muğam Caz Hərəkatının memarıdır.
Vaqif Mustafazadə 1979-cu il dekabrın 16-da Daşkənddə qastrol zamanı ürək tutmasından vəfat edib və Bakıda Yasamal qəbiristanlığında dəfn olunub. O, həmin ildə Azərbaycanın Əməkdar artisti fəxri adına layiq görülmüşdü.
İncəsənət xadimi haqqında “Caz əfsanəsi — Vaqif Mustafazadə” adlı sənədli film çəkilib. 1989-cu ildə cazmenin ev-muzeyi yaradılıb. Muzeyin ilk rəhbəri onun anası Zivər xanım olub. 2004-cü ildə ev təmir edilib və Mədəniyyət Nazirliyinin nəzdində dövlət muzeyi kimi fəaliyyətə başlayıb.
