Avtomobil bazarında aktivliyin kəskin azalması yoxdur, satışlarda fəallıq səviyyəsi normaldır, birinci rübdə ciddi qiymət dəyişikliyi baş verməyib. Bu sözləri aprelin 7-də nəqliyyat üzrə ekspert Eldəniz Cəfərov Reporta verdiyi müsahibədə söyləyib.
O qeyd edib ki, yalnız fevral ayında satışlarda durğunluq yaşanıb: “Martda tətillərin olmasına baxmayaraq, insanlarda avtomobil alqı-satqısına maraq var idi. Fevrala nisbətən mart ayında satışlar 20% artıb. Apreldə bu göstərici daha da artacaq”.
Ekspertin sözlərinə əsasən, avtomobil bazarında əsas maraq Cənubi Koreya və Yaponiya istehsalı olan avtomobillərədir. Təkrar bazarda isə ABŞ və Avropa avtomobilləri liderlik edir.
“Alıcılar ilk növbədə krossoverlərlə maraqlanır. Qarşıdakı aylarda Azərbaycana gətirilən krossover, o cümlədən mini krossoverlərin saynın artacağı gözlənilir. May ayında onların qiyməti maksimum 2-5% civarında arta bilər. Bu da ehtiyat hissələrinin bahalaşması, daşınma qiymətlərinin artması səbəbindən ola bilər”, - E.Cəfərov deyib.
Həmçinin nəqliyyat üzrə mütəxəssis Rusiya avtomobil sənayesindəki böhranın Azərbaycanın avtomobil bazarına təsirindən də danışıb. O bildirib ki, bu böhran yerli bazara təsir etməyəcək, çünki Azərbaycanın alternativ bazarları çoxdur.
