Azərbaycanda ətlik mal-qaranın (danaların) sığortası başlayıb. Bu haqda aprelin 7-də Kənd Təsərrüfatı Nazirliyindən xəbər verilib.
Məlumatda deyilir ki, 11 gündən başlayaraq 5 yaşınadək ətlik mal-qaranı sığortalamaq mümkündür. Sığorta haqqının yarısı dövlət tərəfindən ödənilir.
Sığortalanan heyvanlar peyvəndlənməli, birkalanmalı, EKTİS-də qeydiyyata alınmalı və qapalı yerdə saxlanılmalıdır. Heyvanların sığortalanması üçün iki sığorta zərfi təqdim edilir. Hər bir zərf üzrə iki fərqli azadolma məbləğləri seçmək olar – 10% və 20%.
Birinci sığorta zərfi yoluxucu xəstəliklər, ilan və həşarat sancması, təbii fəlakətlər kimi baza risklərini əhatə edir. Bu zərf üzrə sığorta tarifi 5,4%-6,1% təşkil edir.
İkinci sığorta paketinə heyvanların nəqliyyat vasitəsi ilə vurulması, cərəyan vurması, oğurlanması kimi əlavə risklər aiddir. Bu zərf üzrə sığorta tarifi 9,5%-dir.
Qeyd edək ki, yaşı 29-dan aşağı olan fermerlərə «gənc fermer» güzəşti tətbiq edilir və onlar sığorta haqqını 5% az ödəyirlər.
Sığorta haqqının hesablanması üçün «Heyvandarlıq kalkulyatoru»ndan istifadə etmək olar.
