2021-ci ildə Azərbaycan 4 450 ton dondurulmuş mal əti idxal edib. Bunun da 3 546 tonu və yaxud 79,7%-i Ukraynadan gətirilib. Bu barədə 4 aprel tarixində Kənd Təsərrüfatı Nazirliyinin Aqrar Tədqiqatlar Mərkəzinin Analitika departamentinin müdiri Səadət Hacıyevaya istinadən Report məlumat verib.
Departament müdirinin sözlərinə görə, ölkəyə idxal olunan mal ətinin 80%-dən çoxu dondurulmuş formada gətirilir. O qeyd edib ki, ölkədə ət məhsulları üzrə özünü təminetmə göstəriciləri 85%-dən yuxarıdır: “Əsasən, quş ətində idxaldan nisbətən asılılığımız var. Quş əti üzrə özünü təminetmə göstəricisi 79%, mal əti üzrə isə 87-88% səviyyəsindədir”.
Yerli bazarda dondurulmuş ətin ticarəti ilə məşğul olan Əli Səfərov bildirib ki, Ukraynadan dondurulmuş ətin gətirilməsində problemlər yaranıb: “Hazırda dondurulmuş ət ticarəti ilə məşğul olmuruq. Biz dondurulmuş toyuq budunu da Ukraynadan gətirirdik. Yaranmış vəziyyətlə əlaqədar bazarda istər-istəməz qıtlıq yaranır və bununla bağlı qiymət qalxır”.
"Veysəloğlu" Şirkətlər Qrupunun nümayəndəsi Pərviz Hüseynov isə qeyd edib ki, heyvan qidasının əsasını Ukrayna və Rusiya təmin etdiyi üçün yemin və nəticə etibarilə quş ətinin qiymətində artımın olacağı qaçılmazdır. O, Gürcüstan, Türkiyə və İranı alternativ bazar olaraq qeyd edib. “Bu ölkələrdən qeyd edilən məhsulların idxalı istiqamətində hazırda dövlət səviyyəsində müvafiq tədbirlər görülür”, - deyə Pərviz Hüseynov əlavə edib.
