Ölkə ərazisində hökm sürən əlverişsiz hava şəraiti "Azərbaycan Hava Yolları" QSC-nin (AZAL) Bakı-Naxçıvan istiqamətində uçuşlarının fəaliyyətinə təsir göstərib. Bu barədə İnsanoid səhmdar cəmiyyətə istinadən bu gün, 21 iyun tarixində xəbər verir.
"AZAL sərnişindaşımanın operativ təşkili üzərində fəal işləyir. Təhlükəsizliyin və sərnişinlərə ən yaxşı xidmətin təmin edilməsi istəyini nəzərə alaraq, sərnişinlərin daşınması növbəli şəkildə həyata keçiriləcək. Hazırda iki reysin uçuşu gecikir.
51 sərnişin hoteldə yerləşdirilib, qalanları isə evlərinə getməyə üstünlük verib. Gecə və səhər saatlarında Naxçıvana artıq bir neçə reys həyata keçirilib, digər reyslər cədvələ uyğun olaraq həyata keçiriləcək.
Uçuşların təhlükəsizliyi, sərnişinlərin və ekipaj üzvlərinin rifahı AZAL üçün hər zaman ən yüksək prioritetdir. Bu baxımdan aviaşirkət hər bir sərnişinin təhlükəsizliyini yüksək səviyyədə təmin etməyə çalışır. AZAL Naxçıvanda əlverişsiz hava şəraiti səbəbindən uçuşları gecikmiş sərnişinləri bu vəziyyətlə əlaqədar anlayış göstərib səbirli olmağa çağırır", - deyə aviaşirkət bəyan edib.
