Minval.az redaksiyasına 2024-cü il dekabrın 25-də Qroznıya yaxınlaşarkən vurulan AZAL-a məxsus Embraer E190 sərnişin təyyarəsi ilə bağlı anonim məktub daxil olub. Məktubda, hava hücumundan müdafiə bölməsinin kapitanının izahatı, video və səs yazıları, eləcə də hərbi texnikanın nasaz vəziyyəti ilə bağlı detallı məlumatlar yer alır. Ən sarsıdıcı məqam isə təyyarənin Rusiya Müdafiə Nazirliyinin birbaşa əmri ilə vurulduğu iddiasıdır.
İzahata əsasən, kapitan Dmitri Sergeyeviç Paladiçuk bildirir:
“Mən, kapitan Paladiçuk Dmitri Sergeyeviç, BM №274 komandiri və döyüş hesablamasının rəhbəriyəm. 24.12.2024-dən 25.12.2024-ə qədər Qroznı şəhərinin hava hücumundan müdafiəsi üzrə döyüş növbətçiliyi aparırdım. 25 dekabr saat 05:40-da “hazırlıq №1” komandası daxil oldu. 05:48-də mobil telefon vasitəsilə komandaya keçidi raport etdim. Mövqedə mobil əlaqə zəif idi, başqa sabit rabitə vasitəsi yox idi. Fiber-optik kabellər çəkilsə də, terminala qoşulmamışdı, rəqəmsal telefon isə yox idi.
Saat 08:11-də hədəf aşkarlanıb və MRLİS vasitəsilə dəqiq müşahidəyə götürüldü. Bu barədə 51-ci diviziyanın VKP-sinə məlumat verdim. 08:13-də hədəfin yenilənmiş koordinatlarını bildirdim: α = 338°, məsafə = 7000 m, hündürlük = 490 m, sürət = 118 m/s, kurs = 230°. Telefonda mənə hədəfi məhv etmə əmri verildi. Optik müşahidə ilə hədəfi görmək mümkün deyildi – sıx duman səbəbilə. Bu da VKP-yə bildirildi. Saat 08:13:30-da operatora atəş açma əmri verdim. 08:13:33-də raket buraxıldı. 08:13:47-də BM-72V6 idarəetmə sistemi hədəfin ötürüldüyünü göstərdi. 08:13:48-də ikinci atəş əmri verdim. MRLİS məlumatına görə, birinci raket hədəfə bu koordinatlarda buraxılmışdı: α = 319°, məsafə = 7300 m, hündürlük = 697 m, sürət = 80 m/s. İkinci raket isə hədəfin α = 311°, məsafə = 8000 m, hündürlük = 1300 m, sürət = 120 m/s olduğu anda buraxıldı.”
“Redaksiya olaraq məktubun orijinallığını iddia etməsək də, onun kapitanın imzası ilə təsdiqlənməsi və istintaq üçün mühüm əhəmiyyət daşıması səbəbilə dərc edilməsini vacib sayırıq. Bu sənədin Azərbaycan Respublikasının aidiyyəti orqanları üçün də mühüm sübut ola biləcəyi istisna edilmir.
Üstəlik, məktubun məzmununu təsdiqləyən üç səsli mesajın olduğu audiofayl daha inandırıcı sübut kimi təqdim edilir. Bu mesajlarda üç fərqli səs sahibi əmrin verildiyini, iki dəfə atəş açıldığını və raketin qəlpələrinin təyyarəyə dəyərək faciəyə səbəb olduğunu təsdiqləyir.
Hazırda bu məlumatlar ciddi araşdırma tələb edir və müvafiq strukturların bu məsələni diqqətdən kənarda qoymayacağına inanırıq”, - deyə məlumatda bildirilib.
[gallery link="file" columns="1" size="full" ids="225139"]
