"Bu il 10 ali təhsil müəssisəsinin akkreditasiyası yekunlaşıb". Bunu Təhsildə Keyfiyyət təminatı üzrə Dövlət Agentliyinin sədr müavini, sədr vəzifəsinin müvəqqəti icraçısı Kamran Rəsulov deyib.
Bu barədə 28 noyabr tarixində Report məlumat verib.
Onun sözlərinə görə, 3 universitet isə hazırda qərarvermə mərhələsindədir: "Bura Bakı Mühəndislik Universiteti, ADA və Azərbaycan Tibb Universiteti daxildir. Ümumilikdə bu il üçün 13 ali təhsil müəssisəsinin akkreditasiyadan keçirilməsi nəzərdə tutulub. Bir il sonra təkrar akkreditasiya keçiriləcək. Növbəti ildə də 13 ali təhsil müəssisəsi qrafikə salınıb".
Sədr müavini bildirib ki, 10 ali təhsil müəssisəsinin 3-də təkrar qiymətləndirmə aparılacaq: "Bura Sumqayıt Dövlət Universiteti, Bakı Dövlət Universitetinin Qazax filialı və Azərbaycan Dövlət İqtisad Universitetinin Zaqatala filialı daxildir. Çünki həmin universitetlərdə aparılan monitorinqlərdə müəyyən çatışmazlıqların aradan qaldırılması üçün bir il vaxt verilib".
