Azərbaycanda bu günə qədər sahələrdən kondisiya çəkidə 221 min tondan çox pambıq yığılaraq tədarük məntəqələrinə təhvil verilib. Bu barədə 5 noyabr tarixində Kənd Təsərrüfatı Nazirliyi məlumat verib.
Bu il Azərbaycanın 16 rayonunda ümumilikdə 100 min hektardan artıq sahədə pambıq əkini aparılıb. Ən çox pambıq Saatlı, Ağcabədi, Sabirabad və Bərdə rayonlarının ərazisində əkilib. Bu rayonların ərazisində pambıq əkinlərinin sahəsi 11 min hektardan çoxdur.
Hazırda respublika üzrə pambığın orta məhsuldarlığı 21,2 sent/ha təşkil edir. Ağcabədi, Beyləqan, İmişli, Saatlı, Sabirabad, Yevlax və Zərdab rayonlarında orta məhsuldarlıq göstəricisi ümumrespublika göstəricisindən yüksəkdir.
Ötən il 1-ci sort pambığın 1 tonu fermerlərdən 700 manata alınırdısa, bu il təhvil verilən eyni sort pambığın 1 tonuna görə fermerlərə 800 manat ödənilir. Məhsul subsidiyasına keçid və pambığın alış qiymətinin artırılması fermerləri aqrotexniki becərməni daha yaxşı aparmağa, daha çox məhsul istehsal edərək daha çox gəlir əldə etməyə sövq edir.
