Azərbaycanda fındıqdan kömür və gübrə istehsal oluna bilər. Bu haqda "Agrarco" MMC-nin Baş icraçı direktoru Cavid Kazımova istinadən APA məlumat verib.
“Hazırda fındıq qabığı həm təsərrüfatda istifadə olunur, həm də sakinlər onları yandıraraq evlərini qızdırır. Biz istərdik ki, bu məhsul üzərindən müəyyən istehsallar quraq. Kömür, gübrə və aktivləşdirilmiş kömür istehsal oluna bilər. Hazırda biz bu layihə üzərində işləyirik və beynəlxalq tərəfdaşlarla danışıqlar aparırıq”, - deyə icraçı direktor bildirib.
O, həmçinin qeyd edib ki, Azərbaycanın işğaldan azad edilən rayonlarında da fındıq plantasiyaları salına bilər.
“Qarabağın dağətəyi rayonlarında, Zəngilanda, Kəlbəcərdə kifayət qədər ciddi məhsul əldə etmək üçün lazımi şərait var. Biz bu məsələ ilə bağlı aidiyyəti qurumlara müraciət etmişik və onların cavablarını gözləyirik”, - C.Kazımov deyib.
Şirkət rəhbəri fındıq ixracı məsələsinə də toxunub. Onun sözlərinə əsasən, bu il Avropa bazarına olan ixracın 15%-dək artırılması gözlənilir. Cavid Kazımov məlumat verib ki, ötən mövsümdə şirkət 5,5 min tona yaxın fındıq ixrac edib və məhsul, əsasən, İtaliya bazarına çıxarılıb.
