Azərbaycanda ilk dəfə tullantıların azaldılması üzrə “Recyclaton” hakatonu keçiriləcək. Bu haqda məlumatı bu gün, 28 oktyabr tarixində Ekologiya və Təbii Sərvətlər Nazirliyi verir.
Belə ki, 2-3 dekabr tarixində keçirilməsi nəzərdə tutulan hakaton iştirakçılar arasında yaradıcı düşünmə bacarığını inkişaf etdirəcək, ekoloji problemlərə innovativ həllər təklif etməklə ölkəmizdə ictimai xidmətlərin təşkilində innovasiyaların tətbiqinə töhfə verəcəkdir.
Hakatonu keçirməkdə məqsəd tullantıların azaldılması və təkrar emala cəlb edilməsini təşviq etmək, bu istiqamətdə məlumatlandırma mexanizmi hazırlamaqla ekoloji dayanıqlılığa nail olmaqdır.
Hakatonda iştirakçıların layihə konseptləri sahəvi mentorların dəstəyi ilə prototip (MVP) halına salınaraq münsiflər tərəfindən dəyərləndiriləcək. Dəyərləndirmə nəticəsində ən yaxşı prototip təklif edən komandalara nominasiyalar üzrə I yerə - 6 min manat, II yerə - 4 min manat və III yerə - 3 min manat dəyərində pul mükafatı təqdim olunacaq.
İştirak etmək üçün 10 noyabr saat 23:59-dək qeydiyyatdan keçmək lazımdır.
Qeyd edək ki, hakaton Ekologiya və Təbii Sərvətlər Nazirliyinin tərəfdaşlığı, “ASAN xidmət”in, “ASAN Könüllüləri” Təşkilatının və “Coca-Cola” Fondunun birgə əməkdaşlığı ilə “Tullantısız Dünya” proqramı çərçivəsində baş tutacaq.
