Azərbaycanda qeyri-adi hadisə baş verib. Bu barədə İnsanoid bu gün, 12 fevral tarixində xəbər verir.
“Övladı olmayanların süni mayalanmaya əl atması halları artır. Məlum olduğu kimi, həkimlər ər və arvadın hüceyrələrini götürərək embrion yaradır və qadının bədəninə yerləşdirirlər. Lakin necə əmin olaq ki, həkimlər məhz ər və arvadın hüceyrələrindən istifadə edirlər? Bəlkə hüceyrələr donorlara məxsusdur? Söz açacağım hadisə məhz bu qəbildəndir.”
Hüquqşünas Əkrəm Həsənov sosial şəbəkə hesabında bu haqda danışıb.
O bildirib ki, işin təfərrüatları Ali Məhkəmənin Mülki Kollegiyasının 2(102)-586/2021 saylı iş üzrə 15 mart 2021-ci il tarixli Qərarında əks olunub:
“Süni mayalanma nəticəsində əkiz övladları olan ailə 7 il sonra boşanıb. Bu zaman arvad kişiyə deyib ki, sən heç uşaqların atası da deyilsən, amma aliment tələb edib və bu alimenti ala da bilib. Kişinin sözlərinə görə, onun tam sonsuz olduğunu bilən həkim, Türkiyə əsilli Öndər Tulumbacı arvada başqa kişinin donorluğundan istifadə etməyi təklif edib, o da razılaşıb. Amma bunu kişidən gizlədiblər.
Kişi məhkəməyə müraciət edərək, atalığının ləğv olunmasını tələb edib. Amma başda Ali Məhkəmə olmaqla məhkəmələr kişinin iddiasını təmin etməyiblər. Yəni o, ata kimi qalıb və aliment ödəməyə məcbur edilib.
Bu zaman Ali Məhkəmə iki arqument gətirib:
“Kişi necə sübut etsin ki, razılıq verməyib? Əksinə, klinika sübut etməlidir ki, kişi yazılı formada razılıq verib. Amma klinika həmin razılığı məhkəməyə təqdim edə bilməyib. Deməli, razılıq da olmayıb. Olmayıbsa, digər kişinin donorluğundan istifadə qanunsuz olub. Arvad və klinika (həkim) sövdələşərək kişini aldadıblar.
Odur ki, süni mayalanmaya gedən kişilər və qadınlar! Müqaviləni dönə-dönə oxuyun, həkimləri dəfələrlə xəbərdar edin ki, fırıldaq etməsinlər. Ən əsası isə uşaq doğulandan sonra azı iki fərqli yerdə DNT analizi etdirin ki, uşağın valideyni olduğunuza əmin olasınız. Xüsusən də, bu kişilərə aiddir. Çünki bu uşaqların doğulması, bir qayda olaraq, qadınların razılığı ilə baş verir. Sonradan da məhkəmələr bu fırıldağa qanuni don geyindirir. Bildiyimə görə, digər oxşar məhkəmə işləri də var!"
