Sosial şəbəkələrdə yayılan bu şəkil bir çox adamlarda Azərbaycan tarixi dərsliyində niyə Arsak sözünün istifadə olunduğu barədə çaşqınlıq yaradıb. Qısa bir məqalə ilə bu məsələni aydınlatmaq istəyirik.
Ermənilər indiki Qarabağ ərazisini Arsak adlandıraraq, oranın qədim dövrlərdən onların ərazisi olduğunu bildirirlər və öz yalanlarını əsaslandırmağa çalışırlar.
Arsak (Artsax) - e.ə. IV əsrin sonu - III əsrin əvvəllərində yaranmış Qafqaz Albaniyasının vilayətlərindən biri olub və indiki Qarabağın dağlıq hissəsini və Mil düzünün bir hissəsini əhatə edib. Arsakın əhalisini qarqarlar, utilər, hunlar, xəzərlər və barsillər təşkil edirdilər. Arsak sözü bir çox müəlliflərin fikrinə görə, türk toponimi kimi izah edilir. Ən çox Arsak sözünün tərkibinin türk tayfası olan saklarla bağlı olduğu iddia edilir.
Azərbaycan şərqşünası, tarixçi Ziya Bünyadov ermənilərin səhv olduqlarını tarixi faktlarla sübut edərək demişdi: “Ermənistan dövləti müstəqil siyasi vahid kimi 387-ci ildə mövcudluğunu dayandırıb. Ermənistanın dövlətçiliyi yalnız 1921-ci ildə bərpa olunub. Tutaq ki, 387-ci ilə qədər Arsak Ermənistanın tərkibində idi, bəs Ermənistanın özü ümumiyyətlə mövcud olmayan yerdə, o, necə bunun bir hissəsi ola bilərdi?”
Britaniyalı jurnalist və yazıçı Tomas de Vaal “Qara bağ” kitabında qeyd edir ki, Qarabağı Arsak adlandırmaq düzgün deyil. Qarabağ bölgəsi bir vaxtlar Qafqaz Albaniyasının hissəsi olmuş Arsakdan daha böyük ərazini əhatə edirdi.
Rusiyalı tarix üzrə elmlər doktoru Viktor Şnirelman “Müharibə yaddaşı” kitabında Arsak sözü ilə bağlı yazıb. O, ermənilərin bu sözü qəsdən 1988-ci ildən kütləvi informasiya vasitələrində işiqlandırmağa başladıqlarını qeyd edib.
