Azərbaycanlı mütəxəssis dünyanın ən güclü 10 yaddaşından biri seçilib. Bu barədə 31 yanvar tarixində APA məlumat verib.
Dünya Yaddaş Liqasının reytinq yarışları keçirilib. Beynəlxalq Yaddaş Federasiyasının təşkilatçılığı ilə yanvarın 2-29-da onlayn keçirilən turnirdə həmyerlimiz Orxan İbadov yarışda ən yüksək nəticə göstərən 5 nəfərdən biri olub. O, bu nəticə ilə dünya reytinqindəki xallarını artırıb və ilk onluğa daxil olub.
Qeyd edək ki, Dünya Yaddaş Liqası üzbəüz formatda keçirilən yaddaş yarışıdır. Liqada 4000-ə yaxın iştirakçı olur, onlardan yalnız 131-i reytinqdə yer alır.
36 yaşlı həmyerlimiz dünyanın aparıcı yaddaş və təhsil ekspertlərindən biri sayılır. O, özünün “İkinci beyin” nəzəriyyəsi ilə məşhurdur.
Orxan İbadov ixtisasca hüquqşünasdır, 2001-2007-ci illərdə Bakı Dövlət Universitetinin Hüquq fakültəsində təhsil alıb.
Qeyd olunub ki, bu ilin sonunda Hindistanın Mumbay şəhərində dünya yaddaş çempionatı keçiriləcək.
