Ali Məhkəmə AzTV-nin keçmiş sədri Arif Alışanov və onun ailə üzvlərinə qarşı sui-qəsdə cəhd etməkdə təqsirləndirilən Şücaət Əkbərov və Zöhrab Şirinov barəsində qərar verib. Bu barədə İnsanoid Report-a istinadən bu gün, 29 may tarixində xəbər verir.
Ali Məhkəmədə hakim Nazim Mövsümovun sədrliyi ilə keçirilən iclasda onların hökmdən verdikləri kassasiya şikayəti təmin olunmayıb.
Sui-qəsd cəhdi ilə bağlı 2017-ci ildə 4 nəfər həbs edilib.
Bakı Ağır Cinayətlər Məhkəməsinin hökmü ilə Şücaət Əkbərov 18 il, Qoçəli Cəbiyev 17 il, Zöhrab Şirinov 16 il, Aqşin Hüseynov isə 1 il 4 ay müddətinə azadlıqdan məhrum ediliblər.
A.Hüseynov cəzasını istintaq və məhkəmə müddətində çəkdiyi üçün məhkəmə zalından azadlığa buraxılıb.
Q.Cəbiyev isə 2020-ci ildə həbsdə vəfat edib. Sonradan Apellyasiya Məhkəməsi Ş.Əkbərovun cəzasını 16 ilə, Z.Şirinovun cəzasını isə 14 il 6 aya endirib.
2019-cu ildə AzTV-nin sədri vəzifəsindən azad olunan Alışanovla biznes ortağı olduğunu iddia edən Əkbərov mütəşəkkil dəstə yaradıb, qanunsuz olaraq silah-sursat əldə edib.
O, sifarişlə Arif Alışanov və onun ailə üzvlərini öldürməyə cəhd edib. O, A.Alışanovun 4,6 milyon manatlıq əmlakını ələ keçirmək istəyib.
