Son 5 gündə 9 əcnəbi və 1 Azərbaycan vətəndaşının saxta sənədlərlə dövlət sərhədindən keçmək cəhdinin qarşısı alınıb. Bu barədə martın 15-də Dövlət Sərhəd Xidmətindən məlumat verilib.
Mart ayının 11-də “İzmir-Bakı” reysi ilə ölkəmizə gələn 2 İran vətəndaşının təqdim etdiyi Fransa və Yunanıstan pasportlarının saxta olduğu üzə çıxıb.
12 mart tarixində Türkiyə vətəndaşının “Bakı-London” istiqamətində uçub gedərkən Türkiyə pasportu ilə yanaşı təqdim etdiyi Böyük Britaniya yaşayış kartının saxta olması aşkarlanıb. Həmin gün İran vətəndaşının təqdim etdiyi Böyük Britaniya pasportunun saxtalaşdırılması müəyyən edilib.
Martın 14-də “Doha-Bakı” reysi ilə ölkəmizə gələn 5 nəfər əslən Yəmən vətəndaşlarının da Malayziya pasportlarının saxtalaşdırılması aşkarlanıb.
Martın 15-də isə “Bakı-İstanbul-Nyu-York” reysinin rəsmiləşdirilməsi zamanı Azərbaycan vətəndaşının ABŞ vizasının saxtalaşdırılmış olması müəyyənləşdirilib.
Saxlanılan şəxslər barəsində müvafiq tədbirlər görülüb.
[gallery size="full" ids="37073,37074,37076"]
