Novruz bayramının qeyd edildiyi günlərdə Bakı metropoliteninin gücləndirilmiş iş rejiminə müvafiq dəyişikliklər ediləcək. Bu barədə 18 mart tarixində “Bakı Metropoliteni” QSC məlumat verib.
Belə ki, mart ayının 19-dan 22-dək şəhər mərkəzinə, bayram gəzintisi məkanları və müxtəlif tədbirlərin keçiriləcəyi məkanlara yaxın stansiyalarda əlavə işçi qüvvəsi cəlb edilməklə növbətçilik cədvəli nəzərdə tutulub.
Məlumata əsasən, sərnişin axını və sıxlığını azaltmaq məqsədilə “Nərimanov” elektrik deposunda ehtiyat qatarlar saxlanılaraq zərurət yaranacağı təqdirdə xəttə çıxarılacaq. Qeyd edək ki, “İçərişəhər” (10:30-12:30), “Sahil” (11:30-13:00), “28 May” (12:30-14:00), “Elmlər Akademiyası”(13:30-15:00) stansiyalarında konsert proqramları təşkil ediləcək.
