Son zamanlar sosial şəbəkələrdə yollara asfalt döşəndikdən sonra “lükların” qoyulması geniş müzakirə olunur. Məsələ ilə bağlı 4 aprel tarixində Azərbaycan Avtomobil Yolları Dövlət Agentliyi açıqlama verib.
Agentlikdən bildirilib ki, bəzi şəxslər bu iş prosesinin "yaddan çıxmış və sonradan xatırlanaraq edilən iş" olduğunu düşünürlər: “Əslində isə bu proses texnoloji ardıcıllığa riayət olunmaqla icra edilir və hər hansı bir səhvdən söhbət getmir”.
Öncə yolun hərəkət hissəsində köhnə asfalt-beton örtüyünün üst qatı kənara daşınır. Daha sonra yeni asfalt-beton örtüyünün döşənməsi işlərinə başlanılır. Bu zaman köhnə baxış qapaqlarının üzəri də asfaltlanır və sonradan yerini müəyyənləşdirmək üçün asfalt-beton örtük boya ilə nişanlanır. Yeri nişanlanan baxış qapaqlarının ətrafı kvadrat şəklində xüsusi alətlə səliqə ilə kəsilir və asfalt örtük çıxarılır.
Növbəti mərhələdə kommunikasiya xətlərinin dəmir-beton plitələri layihə hündürlüyünə qaldırılır, baxış qapaqları yerinə qoyulur və kənarları betonlanır. Beton quruduqdan sonra isə qazılan ərazi yenidən baxış qapağı ilə eyni səviyyədə olmaq şərti ilə asfaltlanır.
