1995-ci il oktyabrın 28-də Bakı metropolitenində 289 nəfərin həyatına son qoyan qəza baş vermişdir. Həlak olanlardan 28-i uşaq, 126-sı isə qadın olub. Yaralananların sayı isə 270 təşkil edib.
Həmin gün “Ulduz” və “Nərimanov” stansiyaları arasındakı tuneldə qatar alışıb. Hadisənin səbəbi kimi qatarın nasazlığı ilə yanaşı, maşinistin səhv qərar verməsi də göstərilib. O, qatarı tuneldə saxladığına görə insanlar vaqonlardan çıxıb qaçmağa başlayıblar. Sərnişinlərin çoxu havaçəkmə sistemi yararsız olduğuna görə hava çatışmazlığından ölüb. Ayaq altında qalaraq dünyasını dəyişənlər də az olmayıb.
Qatarın maşinisti və dispetçeri təhlükəsizlik qaydalarına riayət etməməkdə ittiham olunaraq 10 il müddətinə azadlıqdan məhrum ediliblər.
Prezident Heydər Əliyevin Sərəncamı ilə ölkədə 3 gün matəm elan olunub. Vəfat edənlərin ailələrinə 1 milyon manatlıq yardım göstərilib.
Sözügedən hadisə Ginnesin Rekordlar Kitabına dünyada ən böyük metro qəzası olaraq daxil edilib.
