Bakıda 13 yaşlı qızı 37 yaşlı kişiyə nişanlayıblar. Bu barədə İnsanoid Xəzər TV-yə istinadən bu gün, 16 may tarixində xəbər verir.
Hadisə paytaxtın Sabuncu rayonu ərazisində baş verib.
Qohumlar arasındakı razılıq nəticəsində 13 yaşlı qız anasının boşanmış dayısı oğluna nişanlanıb.
Adını məxfi saxladığımız 13 yaşlı yeniyetmə deyir ki, nişanlanmağını ailəsi istəyib, özü isə oxumaq həvəsindədir. Amma məktəbi ibtidai sinfə qədər oxuyub.
Məktəbli qızını dərsə yox, evlənməyə sövq edən ana isə hərəkətinə bəraət qazandırmağa çalışıb.
Qadının sözlərinə görə, övladını nişanlasa da, toyu üçün yetkinlik yaşının bitməsini gözləyəcəklər.
Ailənin daha bir qız övladı var və o da təhsildən yayınır.
Məktəbli qızın nişanlısının anası bildirib ki, qızı ailəsinin razılığı əsasında alıblar.
Məsələ ilə bağlı Elm və Təhsil Nazirliyi ilə əlaqə saxladıq. Nazirlikdən bildirildi ki, qanunvericiliyə uyğun olaraq, 9-cu sinfə qədər təhsil icbaridir. Bu uşağın təhsildən yayınması isə birbaşa valideynin məsuliyyətsizliyidir.
Daxili İşlər Nazirliyini də məsələ ilə bağlı məlumatlandırdıq. Qurumdan bildirildi ki, məsələ araşdırılacaq.
