Bakıda qızı ilə görüşən yeniyetmə oğlanı öldürən atanın istintaq görüntüləri yayımlanıb. Bu barədə İnsanoid Baku Tv-yə istinadən bu gün, 13 yanvar tarixində xəbər verir.
2022-ci il sentyabrın 7-də Sabunçu Rayon Polis İdarəsinə Bilgəh qəsəbəsinin R.Rza küçəsində yerləşən evdə yaşayan 16 yaşlı Hüseynağa Şeydabəyovun həmin tarixdə müəmmalı şəraitdə yoxa çıxması haqda məlumat daxil olub.
Aparılmış araşdırma nəticəsində bir neçə gündən sonra həmin qəsəbədə yaşayan 53 yaşlı Babək Quliyev etiraf edib ki, əvvəl dəniz kənarında yeniyetməni döyüb, sonra isə boğaraq öldürüb. İstintaqla müəyyən edilib ki, Babək Quliyev qızı ilə sevgi münasibətində olan, görüşmək məqsədilə gizlin onun evinə gəlmiş Hüseynağa Şeydabəyovun hərəkətlərindən xəbər tutub.
Qızı ilə görüşməməsini yeniyetmədən tələb etmiş Quliyev növbəti dəfə onu evdə gördükdən sonra öldürmək qərarına gəlib.
Qarajdan götürdüyü iplə oğlanın əl-qolunu ön hissədən bağlayaraq, istifadəsindəki avtomobilinin arxa oturacağına əyləşdirib, onu sentyabrın 7-si gecə saat 1 radələrində dəniz kənarına gətirib. Orada maşından düşürüb, Hüseynağa Şeydabəyovun üzünə və bədəninin digər nahiyələrinə şillə və yumruqla zərbələr vurub. Daha sonra ipi boğazına dolayıb sıxaraq, zərərçəkmişi qəsdən öldürüb.
Cəsədi su çəninin yanındakı 2 metrlik çuxura ataraq, üstünü torpaqla örtüb. Meyit göstərilən yerdən aşkar edilərək çıxarılıb. Məhkəmənin qərarı ilə Babək Quliyev CM-in “köməksiz vəziyyətdə olan adamı qəsdən öldürmə” və “qanunsuz azadlıqdan məhrum etmə yetkinlik yaşına çatmayan şəxs barəsində törədildikdə” maddələri ilə təqsirli bilinib.
O, Bakı Ağır Cinayətlər Məhkəməsinin hökmü ilə cəzasını ciddi rejimli cəzaçəkmə müəssisəsində çəkməklə 18 il müddətinə azadlıqdan məhrum olunub.
