Azərbaycan Respublikası Kənd Təsərrüfatı Nazirliyinin Bakıda yeni inzibati binası istifadəyə verilib. Bu barədə 6 iyun tarixində Prezidentin Mətbuat Xidməti məlumat verib.
Azərbaycan Respublikasının Prezidenti İlham Əliyev açılışda iştirak edib.
Xətai rayonunun Nəcəfqulu Rəfiyev və Süleyman Vəzirov küçələrinin kəsişməsində yeni bina ucaldılıb.
Bildirildi ki, yeni binanın tikintisinə 2017-ci ildə başlanılıb. İnşa olunan bina nazirliyin aparatı ilə yanaşı, Aqrar Kredit və İnkişaf Agentliyi, Aqrar Tədqiqatlar Mərkəzi, Aqrar İnnovasiya Mərkəzi və Aqrar İnkişaf Könüllüləri olmaqla 500-ə yaxın əməkdaşın fəaliyyəti üçün nəzərdə tutulub.
215 otaqdan ibarət mərtəbələrdə əməkdaşların fəaliyyəti üçün hər cür şərait yaradılıb. Ərazidə 170 avtomobil yerlik dayanacaq yaradılıb.
