Bakıda marketdə saxta spirtli içkilər aşkarlanıb. Bu barədə 31 yanvar tarixində Azərbaycan Qida Təhlükəsizliyi Agentliyi məlumat verib.
Bakı şəhərinin Yasamal rayonundakı M.Xiyabani küçəsi, 33 ünvanında fəaliyyət göstərən, fiziki şəxs Rzayev Daşqın Sabir oğluna məxsus “025” marketdə Agentlik əməkdaşları tərəfindən keçirilmiş plandankənar yoxlama zamanı aşkar saxtalaşdırma əlamətləri olan, qida təhlükəsizliyi sertifikatı və üzərində Azərbaycan dilində etiket məlumatları olmayan ümumilikdə 16 ədəd − 2 ədəd 1 litrlik “Chivas Regal” əmtəə nişanlı viski, 2 ədəd 0.5 litrlik və 1 ədəd 1 litrlik “Absolut” əmtəə nişanlı vodka, 11 ədəd 0.5 litrlik “Organik Line” əmtəə nişanlı − spirtli içki aşkar edilib.
Belə ki, içkilərin bir qismində qablaşdırılmada istifadə olunan falqanın və aksiz markanın kustar üsulla sonradan yapışdırıldığı, qaimə və qida təhlükəsizliyinə dair rəsmi sənədlərinin mövcud olmadığı müəyyən edilib.
Faktla bağlı qanunvericiliyə uyğun olaraq, müvafiq tədbirlər görülüb. Aşkar olunmuş alkaqollu içkilərin satışı dayandırılıb və möhürlənərək dövriyyədən çıxardılıb.
