Narkotik istifadəçisi kimi müsahibə vermiş şəxs Bakıda marşrut avtobusu sürür. Bu barədə İnsanoid Qafqazinfo-ya istinadən bu gün, 27 may tarixində xəbər verir.
Dəfələrlə məhkumluq həyatı yaşamış, “Batya Vasmoyski” ləqəbi ilə tanınan Bəxtiyar Ağaməmmədovun paytaxt ərazisində 40 saylı müntəzəm marşrut xətti üzrə sürücü kimi çalışması məlum olub.
“Çinar Trans” MMC-nin istismarında olan xətdə çalışan B.Ağaməmmədovun avtobusla təhlükəli manevrlər etməsi, sərnişinlərlə kobud rəftar etməsi, qeyri-adekvat hərəkətləri diqqəti cəlb edib.
Onun keçmişi ilə bağlı video çəkmiş Nail Kəmərli bildirib ki, müsahibi olmuş “Batya Vasmoyski” həm də vərəm xəstəsi olduğundan izolyasiya məqsədilə dispanserə göndərilib:
“Belə anlaşılır ki, orada da müalicəsini yarımçıq saxlayıb. Biz barəsində film hazırladığımız şəxslərin sonrakı taleyi və davranışlarını sonradan izləyə bilmirik”, - deyə Kəmərli əlavə edib.
Azərbaycan Yerüstü Nəqliyyat Agentliyindən bildirildi ki, 40 saylı marşrut xətti “Çinar Trans” MMC-nin istismarındadır və onlar sürücüyə görə cavabdehdirlər.
Şirkətdən isə gün ərzində mövzu ilə bağlı açıqlama veriləcəyi bildirildi.
