İqtisadiyyat Nazirliyinə məxsus "Təmiz Şəhər" ASC-nin Balaxanı Sənaye Parkında "Eko Step Baku" MMC adlı rezident qeydiyyatdan keçib. Bu barədə 16 mart tarixində Report məlumat verib.
Məlumata əsasən, bu, sayca 25-ci rezidentdir. Yeni rezident tullantı şinlərdən rezin döşəmə istehsalı və satışı ilə məşğul olacaq. Bildirilib ki, şirkət ildə təxminən 300 ton məhsul istehsal etməyi planlaşdırır.
Sözügedən şirkətin təkrar emal nəticəsində əldə olunan rezin örtükləri oyun və idman meydançalarında, fərdi evlərin həyətyanı sahələrində, parkinqlərdə, səkilərdə, piyada keçidlərində istifadə oluna bilər.
Qeyd edək ki, hazırda Azərbaycanda 7 sənaye parkı fəaliyyət göstərir. Bunlar Sumqayıt Kimya, Balaxanı, Mingəçevir, Qaradağ, Pirallahı, Ağdam və Araz Vadisi İqtisadi Zonasıdır. Sənaye zonalarında istehsal olunan məhsullar dünyanın 35-dən çox ölkəsinə ixrac edilir.
