Bu gün Azərbaycan Silahlı Qüvvələri 105 yaşını qeyd edir.
Bu özəl gündə İnsanoidin qonağı qəhrəmanlığı və mərdliyi ilə Birinci Qarabağ müharibəsində seçilən, bu yolda heç nəyini əsirgəməyən alay komandiri “qazaxlı Alik” oldu.
90-cı illərdə çətin siyasi və iqtisadi dövr keçirən Azərbaycanımızın müdafiəsində duran, bu yolda gəncləri daim vətənpərvər ruhda istiqamətləndirən Arif Fuad oğlu Muradov 1958-ci ildə Ağstafa rayonunun Dağkəsəmən kəndində anadan olub.
Birinci Qarabağ müharibəsinin ilk günlərindən ov tüfəngi ilə 15-20 nəfərlə döyüşən “qazaxlı Alik” 1991-ci ildə artıq hərbi hissə yaratmış və öz əsgərləri ilə rəsmi qaydada düşmənə qarşı torpaq müdafiəsində durmuşdur.
Cəbhənin, demək olar, bütün istiqamətlərində vuruşan Arif Muradov ilk şəhidini Xocalı soyqırımından sonra vermiş, özü isə Qazaxın Aşağı Əskipara Xeyrimli kəndinə edilən hücumun qarşısını alarkən yaralanmışdır.
Münaqişənin qızğın vaxtında Seno adlı erməni generalı “qazaxlı Alik”in ölüsünü gətirənə 1 milyon rubl mükafat vəd edir, lakin məqsədinə çatmadan məhz Arif Muradovun dəstəsi tərəfindən başından vurulur.
Qəhrəmanımızın Azərbaycanın dünəni, bu günü və gələcəyi ilə bağlı düşüncələrinin davamı videomüsahibəmizdə:
