Azərbaycanda qızıl, gümüş və mis hasilatı ilə məşğul olan Böyük Britaniyanın "Anglo-Asian Mining Plc." şirkəti 2022-ci ildə 43,114 unsiya qızıl hasil edib. Bu isə 2021-ci illə müqayisədə 10,8% azdır.
Bu barədə 17 yanvar tarixində APA məlumat verib.
Məlumata əsasən, 2021-ci ildə şirkət 48,680 unsiya qızıl istehsal edə bilmişdi.
“Anglo Asian Mining" bu dövrdə 182,046 unsiya gümüş və 2,516 ton mis hasil edə bilib. Başqa sözlə, gümüş istehsalı 18,2% artdığı halda, mis istehsalı 5% azalıb. Mədən şirkəti ötən il ümumilikdə 57,618 unsiya qızıl ekvivalentində (GEOs) qiymətli metal hasil edib ki, bu da ötən ilin eyni dövrünə nisbətən 10,8% az olub.
Qeyd edək ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51%, "Anglo-Asian Mining Plc." şirkətinin payı 49% təşkil edir.
