İlham Namiq Kamal oğlu Əhmədov 9 yanvar 1949-cu ildə Bakıda anadan olub. O, İlham Namiq Kamal kimi tanınır.
O, 1966-1970-ci illərdə indiki Azərbaycan Dövlət Mədəniyyət və İncəsənət Universitetinin dram-kino aktyorluğu fakültəsində təhsil alıb. Tələbəlik dövründə Əhmədov Molyerin “Jorj Danden” komediyasında baş rolu uğurla ifa etdikdən sonra universitetin tədris teatrının aktyor truppasına qəbul olunub.
Aktyor 1972-ci ildə Akademik Milli Dram Teatrına dəvət alıb. 1989-1993-cü illərdə Əhmədov indiki Azərbaycan Dövlət Gənc Tamaşaçılar Teatrında çalışıb. 14 iyul 1993-cü ildə o, “İlham” Miniatür Teatrını yaradıb. 1997-ci ildə isə Əhmədov pedaqoji fəaliyyətə başlayıb.
O, bir müddət Azərbaycan Dövlət Mədəniyyət və İncəsənət Universitetində dərs deyib. 2009-cu ildən sənətkar həmin universitetdə musiqili teatr və kütləvi tədbirlər rejissoru kafedrasının müdiri kimi çalışıb.
Sənətkar “Qayınana”, “Qəribə adam”, “Arvadım mənim - uşaqlarım mənim” kimi filmlərdə çəkilib, onlarla televiziya tamaşalarında rol alıb. O, həmçinin “Mozalan” satirik kinojurnalında yüzə yaxın bədii süjetdə çəkilib.
İlham Əhmədov Əməkdar artist və Xalq artisti adlarına, həmçinin “Şöhrət”, “Sənətkar” ordenlərinə layiq görülüb. Sənətkar 2019-cu ildə TÜRKSOY tərəfindən mükafatlandırılıb.
Hazırda Əhmədov yaratdığı “İlham” Miniatür Teatrında direktor, bədii rəhbər, quruluşçu rejissor və aktyor kimi çalışır.
