Azərbaycanda Milli Mətbuatın əsası 22 iyul 1875-ci ildə maarifçi Həsən bəy Zərdabi tərəfindən nəşr edilən “Əkinçi” qəzeti ilə qoyulub. Məhz buna görə hazırda 22 İyul Azərbaycanda Milli Mətbuat Günü kimi qeyd edilir.
Zərdabi jurnalistlərdən tələb edirdi ki, onlar qəzeti ana dilində yazsınlar, çünki qəzet xalq üçün yaranıb, xalq qəzet üçün yox. O, fars və ərəb birləşmələrindən imkan olduğu qədər çəkinməyə çağırırdı və ana dilindən üz döndərənləri tənqid edirdi.
Azərbaycanda sovet hakimiyyəti qurulduqdan sonra mətbuatın inkişafı daha çox partiyalı mövqe ilə bağlı idi. Məşhur qəzetlər arasında "Kommunist", "Bakinskiy raboçiy", "Vışka" , "Azərbaycan gəncləri", "Molodyoj Azerbaydjana" , "Bakı", "Baku", "Ədəbiyyat və incəsənət" və s. var idi.
Azərbaycan öz müstəqilliyini bərpa etdikdən sonra mətbuat sahəsində də mühüm dəyişikliklər etdi. Bu gün Azərbaycanda 650-dən çox kütləvi informasiya vasitəsi - qəzet, jurnal, informasiya agentliyi və teleradio şirkətləri fəaliyyət göstərir.
