2 fevral tarixinin Gənclər Günü kimi elan olunması və Azərbaycanda dövlət gənclər siyasətinin əsasının qoyulması ümummilli lider Heydər Əliyevin adı ilə bağlıdır.
1994-cü ildə dövlət gənclər siyasətini icra edən Gənclər və İdman Nazirliyi yaradılıb. 1996-cı il 2 fevral tarixində Heydər Əliyevin dəstəyi ilə gənclərin 1-ci forumu keçirilib. Həmin forumda Heydər Əliyev gənclər qarşısında tarixi bir vəzifə qoyub: “Hər bir Azərbaycan gənci hər şeydən çox müstəqil Azərbaycanın bu günü, gələcəyi haqqında düşünməlidir”.
Bir il sonra, 1997-ci ildə Heydər Əliyev “2 Fevral - Azərbaycan Gənclər Gününün elan edilməsi haqqında” Sərəncam imzalayıb. Həmin vaxtdan etibarən Müstəqil Dövlətlər Birliyi məkanında və Şərqi Avropa ölkələri arasında ilk dəfə olaraq, Azərbaycanda Gənclər Gününün təntənəli şəkildə qeyd edilməsi başlanılıb.
Azərbaycanda Gənclər Günü təsis edildikdən sonra - 1998-ci ildə gənclərin işləri üzrə nazirlərin ümumdünya konfransının tövsiyəsi əsasında Birləşmiş Millətlər Təşkilatının 1999-cu il 17 dekabr tarixli qətnaməsi ilə 12 avqust - Beynəlxalq Gənclər Günü elan olunub.
