Qurban bayramı İslamda ən müqəddəs bayramlardan biri sayılır. İslam dinində bu bayram “Eyd əl-Kəbir”(böyük bayram) adlanır. Bayram hər il zilhiccə ayının 10-cu günündən başlayır və adətən, üç gün davam edir.
Qurban bayramı İbrahim Peyğəmbərin həyatında baş verən bir əhvalatla bağlı yaranıb. Bir gün Allah Peyğəmbərə oğlu İsmayılı qurban verməyi əmr edir. Həmin zaman İbrahim Allahın əmrini yerinə yetirməyə, İsmayıl isə qurban olmağa hazır idi. Lakin İbrahim Peyğəmbər oğlunu qurban vermək istəyərkən Allah onu saxlayır, ondan razı qaldığını bildirir. O, İbrahimə oğlu İsmayılın əvəzinə, göndərdiyi qoyunu kəsməyi təklif edir.
Bu hadisədən sonra insanlar hər il ev heyvanlarından birini Allaha qurban kəsirlər. Məhz bu səbəbdən Qurban bayramında kəsilən qurbana “İsmayıl qurbanı” deyilir.
Azərbaycan müstəqillik əldə etdikdən sonra, 1992-ci ildən başlayaraq Qurban bayramı ölkədə dövlət səviyyəsində qeyd olunmağa başlayıb.
