İllər boyu Ermənistanın Vətənimizə qarşı təcavüzü nəticəsində xalqımız minlərlə şəhid verdi. Onların arasında xidməti vəzifələrini yerinə yetirərkən həlak olan jurnalistlər də var. Bu gün onların sırasında olan iki şəhid jurnalist Çingiz Mustafayev və Sirac Abışovun doğum günüdür.
Çingiz Mustafayev özunu hərbi jurnalistikaya həsr edəndən sonra 1991-ci ildən Azərbaycan Dövlət Televiziyasında reportyor kimi fəaliyyət göstərib. Birinci Qarabağ müharibəsi başlayandan sonra cəbhəyə yollanan Çingiz döyüş gedən bütün rayonlardan xəbərlər və reportajlar hazırlayaraq, dünyaya çatdırıb. O, 8 ay ərzində Qarabağ müharibəsi haqqında 18 sənədli film çəkib, Xocalı faciəsi zamanı ermənilərin vəhşiliklərini əks etdirən kadrları lentə alıb. Çingiz Mustafayev 15 iyun 1992-ci ildə Xocalı rayonunun Naxçıvanik kəndində çəkiliş zamanı aldığı mərmi qəlpəsindən həlak olub. O, Bakıdakı Şəhidlər xiyabanında dəfn edilib.
Onun Azərbaycan jurnalistikasındakı qəhrəmanlıq yolunu davam etdirən teleoperator əslən Qubadlıdan olan Sirac Abışovdur. Abışov Birinci Qarabağ müharibəsi zamanı ailəsi ilə birlikdə Qubadlıda olan evini tərk etmək məcburiyyətində idi. O, İkinci Qarabağ müharibəsi zamanı işğaldan azad olunmuş Azərbaycan torpaqlarını video şəklində tamaşaçılara təqdim edirdi. Sirac Abışov 4 iyun 2021-ci ildə Kəlbəcər rayonu ərazisində yerləşən Susuzluq kəndi yaxınlığında baş verən partlayış zamanı şəhid olub. O, 5 iyun 2021-ci ildə Sumqayıt şəhər Şəhidlər xiyabanında dəfn edilib.
Çingiz Mustafayev 1992-ci ildə “Azərbaycanın Milli Qəhrəmanı” adına layiq görülüb. Sirac Abışov isə 2021-ci ildə “Vətənə xidmətə görə” ordeni və “Hərbi vətənpərvərlik tərbiyəsində xidmətlərə görə” medalı ilə təltif edilib.
Allah şəhid jurnalistlərimizə rəhmət eləsin!
