Çingiz Fuad oğlu Mustafayev 29 avqust 1960-cı ildə Rusiyanın Həştərxan vilayətində, hərbçi ailəsində anadan olub.
Mustafayevin ailəsi 1964-cü ildə Bakıya köçüb. O, 1977-ci ildə Yasamal rayonunun 167 saylı məktəbini bitirib. Mustafayev 1977-1983-cü illərdə indiki Azərbaycan Tibb Universitetində təhsil alıb. Təhsilini başa vuran Çingiz təyinatla indiki Şabran rayonunda üç il həkim işləyib.
Çingiz Mustafayevin həkim olmasına baxmayaraq, jurnalistikaya böyük həvəsi var idi. O, 1990-cı il 20 Yanvar hadisələri zamanı sovet ordusunun Bakıda törətdiyi vəhşilikləri lentə alıb. Mustafayev 1991-ci ildən etibarən jurnalist olmağa qərar verir. 1990-cı illərdə o, Azərbaycan televiziyasında “Ekspromt”, “Cümə axşamı” verilişlərinin, “Gənclik” estrada tamaşasının və “Ozan” rok qrupunun yaradıcısı olur.
Mustafayev kiçik heyəti ilə cəbhəyə səfərlər edib, buradakı vəziyyət barədə məlumatlar paylaşırdı. O, Birinci Qarabağ müharibəsi haqqında 8 ay ərzində 18 sənədli film hazırlamışdır. Onun video və fotomaterialları sayəsində dünya ictimaiyyəti Qarabağ münaqişəsi haqqında həqiqətləri öyrənib, Ermənistan qüvvələrinin dinc əhaliyə qarşı törətdiklərindən xəbər tutmuşdur.
Çingiz Mustafayevin hərbi jurnalistlika karyerasında ən böyük xidmətlərindən biri Xocalı soyqırımını lentə alması idi. O, burada yüzlərlə cəsədi lentə alır.
Çingiz Mustafayev 15 iyun 1992-ci ildə Xocalı rayonunun Naxçıvanlı kəndində hərbi əməliyyatların çəkilişi zamanı aldığı mərmi qəlpəsindən həlak olub. O, Bakının Şəhidlər xiyabanında dəfn olunub.
6 noyabr 1992-ci ildə Çingiz Mustafayev “Azərbaycanın Milli Qəhrəmanı” adına layiq görülüb.
