Suveren və bütov Azərbaycan Müstəqillik gününü işğaldan azad edilmiş torpaqlarında da qeyd edir.
28 May - Müstəqillik Günü şanlı tariximizə qızıl hərflərlə həkk olunmuş, hər bir Azərbaycan vətəndaşının qürur mənbəyi olan bir Gündür.
Azərbaycan müstəqillik əldə etdikdən sonra hər il 28 may tarixi Azərbaycanda dövlət səviyyəsində Republika Günü kimi qeyd edilirdi. 15 oktyabr 2021-ci ildən isə 28 May - Müstəqillik Günü kimi qeyd olunmağa başladı.
106 il bundan əvvəl, 28 may 1918-ci ildə Müsəlman Fraksiyası tərəfindən İstiqlal bəyannaməsi imzalanır və bununla da müsəlman şərqində ilk parlament respublikası olan Azərbaycan Xalq Cümhuriyyəti (AXC) yaranır.
23 ay mövcud olmasına baxmayaraq, AXC Azərbaycanın həyatında böyük rol oynaya bilir və dövlət quruculuğu sahəsində mühüm qərarlar qəbul edir. AXC dövründə Azərbaycanın ilk Milli Ordu hissəsi - əlahiddə diviziya, Xalq Cümhuriyyəti Nazirlər Şurasının sədri və daxili işlər naziri Fətəli xan Xoyskinin əmri ilə ilk polis bölümü, Azərbaycanın ilk ali təhsil müəssisəsi - Bakı Dövlət Universiteti yaradılır, Azərbaycan dilinə dövlət dili statusu verilir. 1920-ci ilin aprel ayında sovet ordusu Azərbaycan ərazisini işğal edərək, AXC-yə son qoyur.
18 oktyabr 1991-ci ildə Azərbaycan Respublikasının Azərbaycan Xalq Cümhuriyyətinin varisi olduğu təsbit edilərək, “Azərbaycan Respublikasının dövlət müstəqilliyi haqqında” Konstitusiya Aktı qəbul olunub.
