Emin Sabitoğlu 2 noyabr 1937-ci ildə Bakıda anadan olub.
Sabitoğlu Bakı Musiqi Akademiyasında bəstəkar Qara Qarayevin sinfində təhsil alıb. 1970-ci ildə Sabitoğlu “Bizim Cəbiş müəllim” bədii filminə musiqi bəstələyib. O, həmçinin “Ad günü”, “Təhminə”, “Dədə Qorqud”, “Qaçaq Nəbi”, “Bəyin oğurlanması” kimi filmlərin də musiqi müəllifi olub. Bəstəkarın mahnılarını Şövkət Ələkbərova, Flora Kərimova, Rəşid Behbudov, Yalçın Rzazadə, Hüseynağa Hadıyev, Zeynəb Xanlarova, Mirzə Babayev, Akif İslamzadə və digər müğənnilər səsləndiriblər. O, “Bakı, sabahın xeyir”, “Payız gəldi”, “Bu gecə”, “Ala gözlüm”, “Çiçək yağışı”, “Ayrılma məndən” kimi bir çox məşhur mahnıların bəstəkarıdır.
Bəstəkar 600-dən çox mahnının, 9 musiqili komediyanın, 40-a yaxın filmdəki musiqilərin müəllifi olub.
Emin Sabitoğlu 18 noyabr 2000-ci ildə Bakıda vəfat edib. O, Bakının İkinci Fəxri xiyabanında dəfn olunub.
