Vüqar Həşimov 1986-cı ildə Bakıda anadan olub.
O, 6 yaşından şahmatla məşğul olmağa başlayıb. 1995,1996 və 1998-ci illərdə yaş qruplarında ölkə qalibi olub. O, 1996-2000-ci illərdə dörd dəfə Avropa yeniyetmə birinciliyində vitse-çempion adını qazanıb. Həşimov 1998-ci ildə dünyada şahmat üzrə ən gənc beynəlxalq usta olub. O, 1999-cu ildə Moskvadakı “Kasparov kuboku”nun qalibi olub.
Bir müddət keçdikdən sonra Həşimov beynindən bir neçə dəfə əməliyyat keçirir. Bu səbəbdən o, şahmatı uzun müddətə atmalı olur.
O, 2005-ci ildə yenidən şahmatla məşğul olmağa başlayır. 2006-cı ildə Birləşmiş Ərəb Əmirliklərinin Əbu-Dabi şəhərindəki oyunda 19 qrosmeysteri geridə qoyaraq, qalib gəlib.
Sonrakı illər ərzində o, Xorvatiya, Türkiyə, Rumıniya, İspaniya, və digər klubların heyətində çempion olub. 2008-ci ilin fevralında Həşimov Fransada təşkil olunan “Cappelle Grande” turnirində qalib gəlib. 2008-ci ilin aprelində o, Bakıda şahmat tarixində ilk FİDE Qran-prisində qələbə qazanıb. Bir müddət sonra Vüqar Həşimov şahmat elitasının 10-luğuna daxil olmağı bacarıb.
2009-cu ildə Serbiyanın Novi-Sad şəhərindəki komanda üzrə Avropa çempionatında Azərbaycan millisinin ilk qələbəsi məhz Həşimovun köməyi ilə baş tutub.
2011-ci ildə Vüqar Azərbaycan millisinin tərkibində Yunanıstanda təşkil olunan Avropa çempionatında iştirak edir. Fransaya qarşı oyunda Vüqarın təzyiqi qəfil qalxır və o, oyunu davam etdirə bilmir. Komandalar arasında ikitərəfli razılığa əsasən, görüşdə heç-heçə qeydə alınır. Vüqar turniri başa vurmağa özündə güc tapır və daha iki dəfə qalib gəlir. Yekunda komanda gümüş medal qazanır.
2012-ci ildə o, özünün sonuncu turnirini Hollandiyanın Veyk-an-Zeed şəhərində keçirib. Bu turnirdən sonra Həşimov yarışlarda iştirakını dayandırır və müalicəsini davam etdirməyə başlayır.
Vüqar Həşimov 11 yanvar 2014-cü ildə 27 yaşında beynində bədxassəli şişə (xərçəng) görə müalicə olunduğu Almaniyanın Heydelberq şəhər klinikasında dünyasını dəyişib. Daha sonra o, Bakıdakı Üçüncü Fəxri xiyabanda dəfn olunub.
2016-cı ildə Vüqar Həşimov adına Şahmat akademiyası açılıb. Bundan əlavə, 2019-cu ildə ona həsr olunan “Son gediş - Vüqar Həşimov” adlı sənədli film çəkilib.
