Elçin Qəzənfər oğlu Həmidov 29 iyun 1958-ci ildə Bakı şəhərində anadan olub.
O, 1977-ci ildə İncəsənət İnstitutunun Dram-kino aktyoru fakültəsinə daxil olmuşdur. Həmidov 1983-cü ildə indiki Azərbaycan Dövlət Musiqili Teatrında çalışmağa başlamışdır. O, ilk öncə işıqçı kimi, daha sonra isə aktyor kimi fəaliyyət göstərmişdir.
Elçin Həmidov “Planet parni iz Baku” KVN teatrının əsas aktyorlarından biri idi. O, həmçinin “Məhəllə” və “Məhəllə 2 Moskvada” filmlərində “Məzi” obrazı ilə tanınıb. Bundan əlavə, aktyor “Özümüz bilərik”, “Subaylarınızdan görəsiniz”, “Boşanaq, evlənərik”, “Beş manatlıq gəlin”, “Nəğməli Könül” tamaşalarında rol alıb. Onun səhnədəki son rolu Qoqolun “Evlənmə” tamaşasında olub.
Elçin Həmidov 4 mart 2011-ci ildə vəfat edib. O, Xırdalan qəbiristanlığında dəfn olunub.
