Nəriman Kərbəlayi Nəcəf oğlu Nərimanov 14 aprel 1870-ci ildə Tiflis şəhərində anadan olub.
Nərimanov 1890-cı ildə Qori seminariyasını, 1908-ci ildə indiki Odessa Universitetinin tibb fakültəsini bitirmişdir. O, 1905-ci ildə Sosial-Demokrat “Hümmət” təşkilatının rəhbərliyinə daxil olmuş, Rusiya Sosial-Demokrat Fəhlə (bolşeviklər) Partiyasının (RSDF(b)P) məramnaməsini Azərbaycan dilinə çevirmişdir. 1909-cu ildə İran inqilabi hərəkatında iştirakına görə o, çar hakimiyyəti tərəfindən həbs olunaraq Həştərxan şəhərinə sürgün edilmişdir.
1913-cü ildə Bakıya qayıdan maarifçi 1914-cü ildən Bakının “qara şəhəri”ndə pulsuz müalicəxanada işləyir, neft mədənlərində işləyən fəhlələri və xəstəxanaya yaxın kəndlərin camaatını müalicə edir. O, öz mənzilində də xəstələri pulsuz müalicə edirdi.
Artıq 1917-ci ildə Nərimanov “Hümmət” Təşkilatı Mərkəzi Komitəsinin sədri və RSDF(b)P Bakı Komitəsinin üzvü, “Hümmət” qəzetinin baş redaktoru idi. 1918-ci ilin martında o, Bakı Sovetində şəhər təsərrüfatı üzrə xalq komissarı təyin olunur. Həmin ildə siyasi xadim ağır xəstəliklə əlaqədar olaraq Həştərxan şəhərinə müalicəyə göndərilir. Sağaldıqdan sonra həmin şəhərdə bir sıra partiya orqanlarında çalışır.
Yazıçı 1919-cu ildə Moskvaya çağırılaraq RSFSR Xalq Xarici İşlər Komissarlığında Şərq məsələləri üzrə Xalq komissarının müavini vəzifəsinə təyin edilir. 1920-ci ildə Azərbaycan Xalq Cümhuriyyətinin süqutundan sonra o, Azərbaycan SSR Müvəqqəti İnqilab Komitəsinin Sədri və Xalq Komissarları Sovetinin Sədri vəzifəsini tutur. SSRİ yarandıqdan sonra Nərimanov Mərkəzi İcraiyyə Komitəsinin sədrlərindən biri seçilir.
Nərimanov görkəmli Azərbaycan yazıçısı və dramaturqudur. O, Azərbaycanın “Bahadır və Sona” adlı ilk milli romanının və “Nadir şah” adlı ilk tarixi faciənin banisidir. Publisistin əsərləri əsasında 1956-cı ildə “Şamdan bəy” filmi çəkilmişdir, 1962-ci ildə isə “Bahadur və Sona” operası səhnəyə qoyulmuşdur.
Nəriman Nərimanov 19 mart 1925-ci ildə Moskvada müəmmalı şəkildə vəfat edib və Kremlin divarları yaxınlığında dəfn edilib. Azərbaycanın, Rusiyanın və Qazaxıstanın bir neçə şəhərlərində küçələr, Bakının rayonlarından biri mərhumun adını daşıyır. Həmçinin paytaxtda onun böyük abidəsi ucalır və xatirə muzeyi fəaliyyət göstərir.
