Hacı Məcid oğlu İsmayılov 22 yanvar 1944-cü ildə Bakıda anadan olub.
O, 1961-ci ildə 190 nömrəli orta məktəbi bitirib və bir il Bakı Tütün Fabrikində fəhlə, bir il isə Gənc Tamaşaçılar Teatrında işıqçı işləyib. 1963-cü ildə İsmayılov indiki Azərbaycan Dövlət Mədəniyyət və İncəsənət Universitetinin Kino və dram aktyorluğu fakültəsinə qəbul olub.
İsmayılov 1968-1969-cu illərdə Sumqayıt Dövlət Dram Teatrında aktyor kimi işləyib. 1970-ci ildən sənətkar Azərbaycan Dövlət Akademik Milli Dram Teatrında çalışmağa başlayıb. İlk gündən Hüseyn Cavidin “Xəyyam” faciəsindəki İkinci Qulam rolu ona tapşırılıb.
Sənətkar ilk dəfə “Ad günü” filmində Mustafa rolunu canlandırıb. Bu rol Hacıya uğur qazandırıb və o, 22 aprel 1980-ci ildə Azərbaycan Respublikasının Dövlət mükafatına layiq görülüb. Bundan əlavə, aktyor “Həm ziyarət, həm ticarət”, “Bəyin oğurlanması”, “Yol Əhvalatı”, “Ölsəm, bağışla”, “Ulduz” kimi filmlərdə çəkilib. Həmçinin İsmayılov “Sevil”, “Müsyö Jordan və dərviş Məstəlişah”, “Bəli, dünya dəyişib”, “Qəribə missis Səvic” kimi tamaşalarda rol alıb.
Hacı İsmayılov 1989-cu ildə Əməkdar artist və 2000-ci ildə Xalq artisti fəxri adlarına layiq görülüb. O, həmçinin “Sənətkar” medalı və “Şöhrət” ordeni ilə təltif olunub.
Hazırda sənətkar Azərbaycan Teatr Xadimləri İttifaqının yaradıcılıq üzrə sədr müavinidir.
