Lütfəli Rəhim oğlu Ələsgərzadə 4 fevral 1921-ci ildə Bakının Novxanı kəndində anadan olub. O, Lütfi Zadə kimi tanınır.
Onun 10 yaşı olanda Sovet İttifaqında vəziyyət ağır olduğundan və atası Rəhim Ələsgərzadənin sovet vətəndaşlığı olmadığından ailəsi İrana köçməyə qərar verib. Ömrünü ölkə xaricində keçirdiyinə baxmayaraq, alim Azərbaycanla bağlı olduğunu hiss edirdi, ölkəsindən gələn hər məktubu və zəngi belə bitirirdi: “Xahiş edirəm, mənimlə əlaqəni kəsməyin”.
Lütfi Zadə 1942-ci ildə İranın Tehran Universitetini Elektrik mühəndisliyi ixtisası üzrə bitirib, 1944-1946-cı illərdə ABŞ-nin Massaçusets Texnologiya İnstitutunda təhsil alaraq magistr, 1946-1949-cu illərdə Kolumbiya Universitetində isə doktorluq elmi dərəcəsi alıb. Lütfi Zadə 1959-cu ildən ömrünün sonuna kimi Berkli Kaliforniya Universitetində professor kimi işləyib.
Onun “qeyri-səlis məntiq” nəzəriyyəsi 1980-ci illərdə Yaponiya alimlərinin diqqətini cəlb edib, “Sony”, “Toshiba”, “Nissan”, “Honda”, “Mitsubishi” kimi nüfuzlu şirkətlərin foto və videokameralar, paltaryuyan maşınlar, tozsoranlar istehsalında, avtomobillərin idarə olunmasında geniş istifadə edilib. Bu günə kimi Lütfi Zadənin elmi əsərlərinə 275 min dəfədən çox istinad edilib.
Lütfi Zadə 6 sentyabr 2017-ci ildə Kaliforniyanın Berkli şəhərində vəfat edib və Bakıdakı I Fəxri xiyabanda dəfn olunub.
