Məhəmməd Əmin Rəsulzadə 31 yanvar 1884-cü ildə Bakının Novxanı kəndində anadan olub. O, 1918-1920-ci illərdə mövcud olan Azərbaycan Cümhuriyyətinin qurucusudur.
1991-ci ildə SSRİ dağılandan sonra müstəqil Azərbaycan özünü məhz Azərbaycan Cümhuriyyətinin siyasi varisi elan etmişdi.
Sizə Rəsulzadə haqqında 5 faktı təqdim edirik:
- 1903-cü ildə 19 yaşında olan Rəsulzadə “Azərbaycanlı Gənc İnqilabçılar” adlı ilk siyasi təşkilatını yaradır. Gizli fəaliyyət göstərən bu təşkilatın məqsədi müsəlmanlar arasında maarifçilik fikirlərini yaymaq, gənclərdə milli hisslər oyatmaq, rus məktəblərində tədris olunmayan türk dilini öyrətmək, fəhlələr arasında azadlıq və inqilabi fikirlər yaymaq idi.
- 4 iyun 1918-ci ildə Osmanlı dövləti ilə Azərbaycan Cümhuriyyəti arasında olan Dostluq müqaviləsini Azərbaycanın adından Məhəmməd Əmin Rəsulzadə və Məmmədhəsən Hacınski imzalayıblar. Məhz bu müqaviləni rəhbər tutaraq, Qafqaz İslam Ordusu Bakını bolşevik və daşnaklardan azad edib.
- O, 71 illik ömrünün 31 ilini Azərbaycanda, qalan 40 ilini isə müxtəlif ölkələrdə yaşayıb, Azərbaycanın müstəqillik mübarizəsini aparıb.
- Rəsulzadə Polşada olan zaman, 1932-1939-cu illərdə Polşa xarici işlər naziri olmuş Yozef Bek ilə tanış olmuş və dostlaşmışdı. O, Hitlerin Polşaya 1939-cu ildəki hücümudan əvvəl yurdunu tərk edib, qaçarkən tapançasını bir xatirə olaraq Rəsulzadəyə hədiyyə etmişdi.
- Rəsulzadə Azərbaycanın sovet işğalından qurtulacağına və istiqlaliyyətini bərpa edəcəyinə daima inanırdı. O, 1920-ci illərdə deyirdi: “İstiqlalımızla bərabər yaşadığımız məsud gündə “bir dəfə yüksələn istiqlal bayrağı bir daha enməz!” demişdim… Ey vətənin idealist gəncliyi, bayrağımız enməmiş, o, imanlı azəri gəncliyinin əlindədir, çox çəkməz, o əl onu təkrar Azərbaycanın üfüqlərində dalğalandıracaqdır. Yaşa şanlı bayrağınla, ey Azərbaycan gəncliyi”.
