Aygün Ziyad qızı Səmədzadə 11 yanvar 1967-ci ildə Bakıda anadan olub.
Onun bəstəkar kimi ilk işi 1996-cı ildə Flora Kərimovaya yazdığı “Ruhumuz qovuşacaq” mahnısı olub. Bundan əlavə, sənətkar Eyyub Yaqubov, Brilliant Dadaşova, Aygün Bəylər, İlhamə Quliyeva, Lalə Məmmədova və s. müğənnilər üçün də mahnılar bəstələyib. Aygün Səmədzadə bir çox tanınan müğənnilərin repertuarında xüsusi yer tutan 200-dən artıq mahnı və rəqsin müəllifidir.
Sənətkar 1999-cu ildə şairə Kəmalə Abiyeva tərəfindən yazılmış “Məktəb illəri” şeirinə musiqi bəstələyib. Həmin mahnı ona 2000-ci ildə keçirilən “Yaxşıların yaxşısı” müsabiqəsində “İlin bəstəkarı” nominasiyasında qələbə qazandırıb. 2002-ci ildə keçirilən “Nəğmələrin nəğməsi” müsabiqəsində isə Səmədzadənin bəstələdiyi “Tut ağacım” mahnısı “Qran-Pri”yə, “Bu dünyanı nağıl bilək” mahnısı birinci, “Yağış” mahnısı isə ikinci yerə layiq görülüb.
Aygün Səmədzadə 2011-ci ildə Azərbaycan Respublikasının Əməkdar incəsənət xadimi, 2018-ci ildə Xalq artisti fəxri adlarına layiq görülüb.
2012-ci ildən sənətkar “NƏFƏS” Sənət Mərkəzinin rəhbəridir.
