Gizir Mübariz Ağakərim oğlu İbrahimov 7 fevral 1988-ci ildə Biləsuvar rayonunun Əliabad kəndində anadan olub.
1994-2005-ci illərdə Mübariz Əliabad kənd orta məktəbində təhsil alıb. Daha sonra o, hərbi xidmətə yollanıb. 2005-2007-ci illərdə Daxili Qoşunların N saylı hərbi hissəsinin Xüsusi Təyinatlı Bölüyündə hərbi xidmət keçib. 2009-cu ilin avqustunda valideynlərini razı salaraq, yenidən hərbi xidmətə yollanıb. 2010-cu ilin aprel ayından Tərtər rayonunun N saylı hərbi hissəsində xidmətə başlayıb.
18-19 iyun 2010-cu il gecə radələrində Mübariz İbrahimov heç kimə xəbər vermədən 1 km-lik minalanmış sahəni keçir, 5 saat ərzində təkbaşına döyüşərək düşmənin çox sayda canlı qüvvəsini məhv edir. O, bu qeyri-bərabər döyüşdə qəhrəmancasına şəhid olur. Mübariz Bakı şəhərindəki II Şəhidlər xiyabanında dəfn edilir.
22 iyul 2010-cu ildə Mübariz İbrahimova Azərbaycanın Milli Qəhrəmanı adı verilib.
4 oktyabr 2020-ci ildə İkinci Qarabağ müharibəsi zamanı Mübariz İbrahimovun şəhid olduğu posta Azərbaycan Bayrağı sancılıb.
