Mehdi Hənifə oğlu Hüseynzadə 22 dekabr 1918-ci ildə Bakının Novxanı qəsəbəsində anadan olub.
Alman faşistlərinin Sovet İttifaqına hücumu başlayanda Mehdi könüllü olaraq cəbhəyə yollanıb. O, 1942-ci ildə cəbhəyə yollanıb, Stalinqrad döyüşündə iştirak edib. Mehdi Rusiyanın Kalaç şəhəri yaxınlığındakı döyüşlərdə yaralanaraq, faşistlərə əsir düşüb. Lakin 1943-cü ildə o, başqa hərbi əsirlərlə birgə qaçaraq, partizan dəstəsinə qoşulub. Burada Hüseynzadə “Mixaylo” ləqəbini alıb və kəşfiyyatçı kimi fəaliyyət göstərib.
Mehdi qoşulduğu partizan dəstəsinin iştirakı ilə bir çox uğurlu əməliyyatlar keçirib. Onlar həbsxanalara hücum edərək sovet əsgərlərini azad ediblər, qiymətli topoqrafik xəritələri ələ keçiriblər, kazarmalarda, kinoteatrlarda partlayışlar törədiblər və xeyli faşist hərbi texnikasını məhv ediblər. Mixaylonun tutulması və öldürülməsi üçün alman komandanlığı 400 min marka məbləğində mükafat vəd etmişdi.
Mehdi Hüseynzadə 2 (16) noyabr 1944-cü ildə Sloveniyanın Vitovle kəndi yaxınlığında faşistlərin hücumu zamanı həlak olub və indiki Sloveniya ərazisində yerləşən Çepovani kəndində dəfn edilib. 1957-ci ildə faşistlərə qarşı mübarizədə göstərdiyi qəhrəmanlığa görə, Mehdi Hüseynzadəyə ölümündən sonra “Sovet İttifaqı Qəhrəmanı” adı verilib.
