Polad Həşimov 2 yanvar 1975-ci ildə Qəbələnin Vəndam kəndində anadan olub.
O, uşaq ikən ailəsi ilə birgə Sumqayıt şəhərinə köçüb. Həşimov orta təhsilini Sumqayıt şəhərinin 28 nömrəli, sonra isə 34 nömrəli məktəbində alıb. Daha sonra Həşimov Ali Hərbi Məktəbi bitirib, sonralar təhsilini Türkiyədə davam etdirib.
Polad Həşimov 2016-cı ildə aprel döyüşlərinin iştirakçısı olub. Bu döyüşlərdən sonra o, 3-cü dərəcəli “Vətənə xidmətə görə” ordeni ilə təltif edilib. 2019-cu ildə isə Həşimova general-mayor rütbəsi verilib.
Polad Həşimov iyulun 13-dən 14-ə keçən gecə Tovuz rayonu istiqamətində döyüş zamanı qəhrəmancasına şəhid olub. 14 iyul Həşimovun nəşi əvvəlcə Qəbələ rayonunun Vəndam qəsəbəsinə, sonra isə Sumqayıt şəhərinə gətirilib. Həşimov 15 iyul 2020-ci ildə Bakının II Fəxri xiyabanında dəfn olunub. 9 dekabr 2020-ci ildə Polad Həşimov “Azərbaycan Milli Qəhrəmanı” fəxri adına layiq görülüb.
İyulun 13-dən 14-nə keçən gecə və səhər saatlarında Azərbaycan-Ermənistan dövlət sərhədinin Tovuz rayonu istiqamətində şiddətli döyüşlər davam edib. Həmin gün düşmən hücumunun qarşısını alarkən Azərbaycan Ordusunun hərbi qulluqçuları: polkovnik Mirzəyev İlqar Anzor oğlu, mayor Əhmədov Namiq Hajan oğlu, mayor Novruzov Anar Gülverdi oğlu, gizir Zeynallı İlqar Ayaz oğlu, gizir Babayev Yaşar Vasif oğlu, əsgər Mustafazadə Elçin Arif oğlu qəhrəmancasına şəhid olublar.
