2023-cü ilin yanvar-mart aylarında Azərbaycanda 370 yol qəzası baş verib, 173 nəfər ölüb, 326 nəfər yaralanıb. Bu barədə 12 may tarixində Statistika Komitəsi məlumat verib.
Bildirilib ki, 2022-ci ilin müvafiq dövrü ilə müqayisədə 8,2% az yol-nəqliyyat hadisəsi qeydə alınıb. Bu hadisələr nəticəsində zərər çəkən şəxslərin sayı 10,3% azalaraq 499 nəfər olub. Onlardan 173-ü həlak olub, 326-sı isə yaralanıb.
Hadisələrin 46,8%-i gündüz, 31,9%-i gecə, 21,3%-i isə toran vaxtı baş verib, 26,2%-i həftənin şənbə və bazar günlərinə təsadüf edib.
Nəqliyyat vasitələrinin sərxoş vəziyyətdə idarə olunması səbəbindən ölümlə və ya bədən xəsarəti alınması ilə nəticələnən 13 hadisə baş verib, nəticədə 3 nəfər həlak olub, 16 nəfər yaralanıb. Hadisələrin 11-i minik avtomobillərinin sürücüləri tərəfindən törədilib.
