Cəlilabad rayonunda fermerlər kartof ixracında yaranmış problemlə üzləşiblər. Bu məqsədlə fermerlərlə görüş keçirilib. Bu barədə 4 may tarixində Report məlumat verib.
Görüşdə rayon icra başçının müavini, Azərbaycan Dəmir Yolları QSC-nin Cəlilabad stansiyasının rəisi, Kiçik və Orta Biznesin İnkişafı Agentliyinin Lənkəran Regional Koordinatorluğu, Antiinhisar və İstehlak Bazarına Nəzarət Dövlət Xidmətinin 6 saylı Regional bölməsinin müdiri və Rayon Suvarma Sistemləri idarəsinin rəisi iştirak edib.
Görüşdə müzakirələr aparılaraq sağlam rəqabət mühitinə müdaxilə edən və süni əngəllər yaradaraq fermerləri maliyyə itkisinə məruz qoyan şəxslərə qarşı qanunamüvafiq tədbirlərin görülməsi üçün aidiyyəti üzrə müraciət olunması barədə qərar qəbul olunub.
Fermerlərə bildirilib ki, onlar hər zaman dövlət qayğısı ilə əhatə ediləcəklər.
